Umujyi wa Kigali washimiye itangazamakuru ku ruhare rukomeye mu kugeza amakuru ku baturage
Umuyobozi w’Umujyi wa Kigali, Dusengiyumva Samuel, yashimiye itangazamakuru ku bufatanye bwiza n’umusanzu ukomeye ryagize mu kugeza ku baturage amakuru ajyanye n’ibikorwa bitandukanye byateguwe n’ubuyobozi bw’Umujyi.
Ibi yabigarutseho kuri uyu wa Gatatu, Tariki ya 21 Mutarama 2026, mu gikorwa cyateguwe n’Umujyi wa Kigali kigamije gushimira abanyamakuru ku mikorere myiza n’ubufatanye bagaragaje mu mwaka ushize, ndetse no kurebera hamwe uko ubufatanye bwarushaho kunozwa muri uyu mwaka wa 2026.
Umuyobozi w’Umujyi wa Kigali yashimangiye ko itangazamakuru ryabaye umufatanyabikorwa w’ingenzi mu kumenyekanisha gahunda n’imishinga igamije guteza imbere imibereho myiza y’abatuye Umujyi wa Kigali, by’umwihariko mu kubagezaho amakuru ku gihe kandi mu buryo bworoshye.
Yagize ati: “Itangazamakuru ryagize uruhare runini mu kugeza ku baturage amakuru y’ibikorwa by’Umujyi, ribafasha gusobanukirwa gahunda zinyuranye, bityo bakazigiramo uruhare rufatika.”
Yanashimye by’umwihariko uruhare rw’itangazamakuru mu gihe cy’amarushanwa y’amagare ku rwego rw’Isi yabereye mu Mujyi wa Kigali, aho abanyamakuru bagize akamaro gakomeye mu gutanga amakuru ku gihe, bigafasha abaturage n’abakunzi b’ayo marushanwa kuyakurikirana neza.
Abanyamakuru bitabiriye iki gikorwa bashimiye ubuyobozi bw’Umujyi wa Kigali ku bw’icyizere bubagirira, biyemeza gukomeza gukora kinyamwuga, batanga amakuru yizewe kandi yubaka, agamije iterambere ry’Umujyi n’igihugu muri rusange.
Iki gikorwa cyabaye umwanya wo kungurana ibitekerezo ku ruhare rw’itangazamakuru mu iterambere, hanarebwa uko ubufatanye bwarushaho gukomera hagamijwe kunoza imitangire y’amakuru mu mwaka wa 2026 no mu myaka iri imbere.
